سرد موسم میں سیاست گرم، بڑی جماعتیں آج ملک بھر میں جلسے کریں گی

الیکشن کا دن قریب آنے کے ساتھ سیاسی سرگرمیاں بھی بڑھتی جا رہی ہیں آج بھی بڑی جماعتیں ملک بھر میں جلسے کر کے عوام کو اپنی جانب کرنے کی کوشش کریں گی۔

اے آر وائی نیوز کے مطابق الیکشن جیسے جیسے قریب آ رہے ہیں موسم سرد ہونے کے باوجود سیاست میں گرما گرمی بڑھتی جا رہی ہے اور بڑی سیاسی جماعتیں انتخابات جیتنے کے لیے انتخابی مہمات چلاتے ہوئے جیت کے لیے ایڑی چوٹی کا زور لگا رہی ہیں۔

پاکستان پیپلز پارٹی آج راولپنڈی کے تاریخی لیاقت باغ میں عوامی طاقت کا مظاہرہ کرے گی۔ جلسے کی تیاریاں مکمل ہیں۔ اس جلسے سے چیئرمین پیپلز پارٹی بلاول بھٹو زرداری اور دیگر رہنما خطاب کریں گے۔

مسلم لیگ ن آج سیالکوٹ میں پاور شو کرنے جا رہی ہے۔ جلسہ گاہ میں تیاریوں کو مکمل کر لیا گیا ہے  اور پنڈال میں 30 ہزار کرسیاں لگائی گئی ہیں۔ جلسے سے میاں نواز شریف کے علاوہ شہباز شریف اور مریم نواز بھی خطاب کریں گی۔

شہر قائد کراچی میں آج جماعت اسلامی سیاست کا میدان گرم کرے گی جس کے لیے باغ جناح میں پنڈال سجایا جائے گا۔ جلسے سے امیر جماعت اسلامی سراج الحق ودیگر خطاب کریں گے۔

جمعیت علمائے اسلام (ف) آج پیپلز پارٹی کے گڑھ لاڑکانہ میں سیاسی قوت کا مظاہرہ کرے گی جس سے جے یو آئی کے سربراہ مولانا فضل الرحمان سمیت دیگر رہنما خطاب کریں گے۔

Leave a Reply

Your email address will not be published. Required fields are marked *