News4

نتیش اگلا اسمبلی انتخاب چاہے جس اتحاد کیساتھ لڑیں‘ناکام ہونگے

انہیں 20 سے زیادہ سیٹیں نہیں ملیں گی،پرشانت کشور کا دعویٰ
بہار کے عوام اس دھوکہ بازی کو انہیں سود سمیت واپس کریں گے

پٹنہ: بہار میں نتیش کمار کی سیاسی قلابازی کے درمیان جن سوراج پارٹی کے سربراہ اور انتخابی حکمت عملی ساز پرشانت کشور نے سخت تنقید کی ہے۔ انہوں نے کہا کہ نتیش کمار اگلا اسمبلی انتخاب چاہے جس اتحاد کے ساتھ لڑیں، انہیں 20 سیٹوں سے زیادہ نہیں ملیں گی اور وہ ناکام ہوں گے۔ اگر وہ اس سے زائد سیٹیں جیت جاتے ہیں تو میں اپنے کام سے سنیاس لے لوں گا۔اس سے قبل بھی پرشانت کشور نے نتیش کمار پر سخت تنقید کی تھی اور کہا تھا کہ اگر وہ انڈیا الائنس کے ساتھ پارلیمنٹ کا الیکشن لڑتے ہیں تو انڈیا الائنس کو 5 سیٹیں بھی نہیں ملیں گی، اگر پانچ سے زیادہ سیٹیں ملتی ہیں تو وہ عوامی طور پر معافی مانگ لیں گے۔ اب جبکہ نتیش کمار اپنا پالا بدل کر بی جے پی کی گود میں جابیٹھے ہیں پرشانت کشور نے ایک بار پھر انہیں اپنی تنقید کا نشانہ بنایا ہے۔پرشانت کشور نے کہا ہیکہ نتیش کمار بہت چالاک ہیں۔ وہ بہار کے لوگوں کو دھوکہ دے رہے ہیں لیکن بہار کے عوام ان کی یہ چالاکی انہیں سود سمیت واپس کرے گی۔ نتیش نے بی جے پی کے ساتھ یہ جو نیا اتحاد بنایا ہے وہ 2025 تک نہیں چل پائے گا۔ اس سے بی جے پی کو زبردست نقصان ہوگا۔ پرشانت کشور نے دعویٰ کیا کہ اگلے اسمبلی الیکشن میں اگر نتیش کمار کی پارٹی کو 20 سے زیادہ سیٹیں ملتی ہیں تو میں اپنے کام سے سنیاس لے لوں گا۔

Leave a Reply

Your email address will not be published. Required fields are marked *