News4

نتیش کمار کی پھر قلابازی، این ڈی اے میں شامل ہوگئے

بہار کے چیف منسٹر کی حیثیت سے استعفیٰ اور پھر حلف برداری، 8 وزراء نے بھی حلف لیا

پٹنہ: بہار میں جاری سیاسی اتھل پتھل کے درمیان نتیش کمار نے ریاست کے نویں وزیر اعلیٰ کے طور پر حلف اٹھا لیا۔ ان کے ساتھ دو نائب وزرائے اعلیٰ سمراٹ چودھری اور وجے سنہا نے بھی حلف لیا۔ اس کے علاوہ متعدد وزرا نے بھی حلف اٹھا لیا ہے۔ رپورٹ کے مطابق نتیش کمار نے نئی وزارتی کونسل تشکیل دینے میں متعدد ذاتوں پر توجہ دی ہے۔ بی جے پی کے قومی صدر جے پی نڈا نے حلف برداری تقریب میں شرکت کی۔میڈیا کے مطابق راج بھون کے راجندر ہال میں منعقدہ حلف برداری تقریب کے دوران گورنر راجندر وشوناتھ آرلیکر نے نتیش کو عہدے اور رازداری کا حلف دلایا۔ نتیش کے حلف لیتے ہی بہار میں ایک مرتبہ پھر این ڈی اے کی حکومت برسراقتدار آگئی ہے۔ رپورٹ کے مطابق حلف لیتے ہی راج بھون ’جے شری رام‘ کے نعرے سے گونج اٹھا۔قبل ازیں، نتیش کمار نے کئی روز سے جاری قیاس آرائیوں کی تصدیق کرتے ہوئے اتوار کے روز اپنے عہدے سے استعفیٰ دے دیا۔ نتیش کے استعفیٰ کے ساتھ ہی بہار کی 17 ماہ پرانی عظیم اتحاد کی حکومت کا خاتمہ ہو گیا۔ استعفیٰ دینے کے بعد نتیش کمار نے این ڈی اے قانون ساز پارٹی کے اجلاس میں میں شرکت کی، جہاں انہیں قائد منتخب کر لیا گیا۔ اس کے بعد نتیش کمار دوبارہ گورنر کے پاس پہنچے اور حکومت بنانے کا دعویٰ پیش کیا۔ نتیش نے گورنر کو بی جے پی اور جیتن رام مانجھی کی قیادت والی ہندوستانی عوامی مورچہ کا حمایتی خط سونپا۔استعفیٰ دینے سے پہلے نتیش کمار نے جے ڈی یو کے ارکان اسمبلی کے ساتھ اجلاس کے دوران کہا کہ اب ایک ساتھ رہنا مشکل ہے اور استعفیٰ دینے کا وقت آ گیا ہے۔ نتیش کمار نے کہا کہ میں طویل عرصے سے کسی بھی چیز پر تبصرہ نہیں کر رہا ہوں کیونکہ عظیم اتحاد میں چیزیں ٹھیک نہیں تھیں۔ میں اپنے پارٹی کارکنوں سمیت ہر کسی سے رائے اور مشورے لے رہا تھا۔ میں نے ان سب کی بات سنی اور آج استعفیٰ دے دیا۔ اس طرح نتیش کمار نے ریکارڈ 9ویں بار بہار کے چیف منسٹر کی حیثیت سے حلف لیا اور ان کے ساتھ 8 نئے وزراء کی بھی حلف برداری ہوئی۔جنتا دل (یونائیٹڈ) کے صدر نتیش کمار کو گورنر نے عہدے کا حلف دلایا۔ کمار کے ساتھ ساتھ آٹھ نئے وزراء نے نئی این ڈی اے حکومت میں حلف لیا۔ بی جے پی سے تین سمرت چودھری، وجے کمار سنہا، پریم کمار۔ جے ڈی یو سے تین – وجے کمار چودھری، بیجندر پرساد یادو، شراون کمار اور ہندوستانی عوام مورچہ (سیکولر) کے صدر سنتوش کمار سمن اور آزاد ایم ایل اے سمیت کمار سنگھ نے وزراء کے طور پر حلف لیا۔

Leave a Reply

Your email address will not be published. Required fields are marked *